Arratsaldean ere izango da zer ikusi. Polikiroldegian, taldekako ginkana egingo da herri kiroletan oinarrituta. Bertan hainbat aurpegi ezagun arituko dira nor baino nor. Txirrindulariak ez ezik, Kepa Peñagarikano bezalako pilotariak, Ion Eizagirre erremontista profesional ohia, Enbatako arraunlariak, errugbi taldeko kirolariak, Cristian Pielhoff bezalako aurkezleak, Jose Luis Korta… Giro alaia eta ‘pike’ sanoa sustatu nahi dute. “Kortarekin, ziurtatuta dago”, esan zuten anolatzaileek. Arritxu Iribar kirol kazetariak eta Anjel Alkainek jarriko dute gatza eta pipera, ginkana zuzenean komentatuz.
Ondoren, frontoian, Pirritx, Porrotx eta Marimototsek ikuskizun berezia eskainiko dute frontoian. Abesti ezagunak kantatuko dituzte ospetsuekin batera, Oskorrik Gabonetan ETB1en eman ohi duen kontzertuaren antzeko formatuarekin, “baina hobeto kantatuz”, argitu zuen Porrotxek, aurkezpenean bildutakoen algara artean. Atsedenaldietan hainbat opari zozketatuko dira, goi mailakoak gainera: Lance Armstrong eta Alberto Contadorrek sinatutako maillotak, Patxi Usobiaga edo Alberto Iñurrategiren materiala, Ken 7-k sinatutako diskoa… “Egia esan, pertsona askok egin dute bat gurekin, eta laguntza hori eskertu nahi dugu”, esan zuen Irizarrek.
Txokolatada batekin amaituko da eguna. Zozketarekin eta ikuskizunaren sarrerekin lortutako dirua Aspanovas Gipuzkoarentzat izango da. Gaurtik aurrera eros daitezke sarrerak, internet bidez, Prentsaurrekoan bildutakoek gogorarazi zutenez, minbiziak eragiten ditu haurren artean heriotz gehien gure gizartean, auto istripuen atzetik. Indarra eta alaitasuna minbiziaren aurkako borrokan ezinbestekoak direla azpimarratu zuten, halaber, “Kontraesana badirudi ere, umore ona da botikarik onena. Gaixotasunarekiko distantzia hartu beharra dago, gaixotasunari aurre egin ahal izateko”, adierazi zuen Txomin Arrutik. Guzti horregatik, festarekin bat egiteko eta dibertitzeko dei egin zioten mundu guztiari.
Mobi Bik izenaren nondik norakoa azaldu zuen Arrutik: “Mobi mugimenduarekin identifikatzen da. Martxan jartzea, eta aktiboki inplikatzea. Bik bizikletatik dator, eta bizitza eredu osasuntsua, eramangarria eta gertukoa irudikatzen ditu”. Herman Melvillek XIX. mendean idatzitako nobela famatuarekin ere badu lotura. “Obra horren irakurketetako bat gaizkiaren pertsonifikazioa den animaliaren aurkako borroka da”. Informazio gehiago edo Aspanovasekin harremanetan jarri nahi dutenek info@aspanovasgipuzkoa.org helbidera idatzi, edota 943 245620 edo 656 755221 telefonoetara idatzi besterik ez daukate.